Thursday, February 03, 2011

عراق توركمان خلقي فولكلورونا اؤتري بير باخيش
نوشته شده توسط رحمتلیک محمدعلی فرزانه
06 اسفند 1388 ساعت 23:08

«هر خلقين فولكلورو، او خلقين ان صاف گؤستريجي سيدير.»


هر خلقين فولكلورو، او خلقين ان صاف گؤزگوسو و گؤستريجي سيدير. ايسته‌سك بو مسئله‌يه داها دريندن ياناشاق، هئچ چكينمه‌ده‌ن دئيه بيله‌ريك كي ، فولكلور، سؤزون گرچك آنلاميندا، خلق وارليغي‌نين تاريخي ـ اجتماعي پسيكولوژيسيدير. اونون تاريخ بويو ايسته‌ك و آرزولاري‌نين، تفكر و تصورونون، سئوينج و كدري نين توكنمز خزينه‌سيدير. بو خزينه‌ده خلقين تاريخي، ديلي، مادي ـ معنوي وارليغي، اينانيشلاري، عادت و عنعنه‌لري قورونوب ساخلانيلير. ائله بونا گؤره‌ده هر خلقين فولكلورونو بيلمه‌دن، اونو آراييب ـ دارامادان، او خلقين تاريخي ـ اجتماعي پسيكولوژيسيني و ائتنيك مدني وارليغيني تانيماق و تانيتديرماق چتين اولور.

دونيا تاريخي عرصه‌سينده تورك سويلو خلق لرين چوخ قديم و زنگين تاريخه مالك اولدوقلاري اوچون اونلارين تاريخ و حتي تاريخدن اؤنجه كي عصرلرده گئنيش و رنگارنگ فولكلورو شيفاهي خلق ادبياتي اولموشدور. بو خلق لرين ياشام تاريخي ايله ياشيد اولان فولكلور و شيفاهي خلق ادبياتي، تورك سويلو خلق‌لرين عصيرلر بويو گليشمه‌سي و باشدان آشيرديغي اولايلار و ماجرالار ايله يارانان شيفاهي خلق ادبياتي ايلكين امك نغمه‌لريندن باشلاميش بو گونه قده‌ر نسيللردن ـ نسيللره و سينه‌لردن سينه‌لره نقل اولدوغو حالدا خلقين ياشام سيناقلاري و مدركلرين تجربه و گؤروشلري ايله ساخلاشيب و بو گونكو دوروما بيزه گليب چاتميشدير. عراقدا قرنلر اوزونو ياشايان و بوگون توركمان يا عراق توركلري آدي ايله تانينان خلق ائتنيك باخيمدان آذربايجان و ايرانين آيري ـ آيري بؤلگه‌لرينده ياشايان خلقلر ايله آذربايجان سويلو اوْلموش و تاريخي سندلرين گؤستريشينه اساساً بايات بويوندان اولموشلار.


اونلار بوتون چتينليكلره و اوغورسوزلوقلارا قاتلاشماقلا برابر، اؤزلريله داشيديقلاري فولكلورو شيفاهي خلق ادبياتي ياشاتميش و قورموشلار. نئچه ايل بوندان اول، دونياميزي ترك ائتميش گوركملي بيلگين و ادبيات شناس پروفسور ياشار قارايف، جنوبي آذربايجان عالم و آراشديريجيسي دوقتور هيئت‌ين “آذربايجان فولكلورو” اثرينه يازديغي باش سؤزده بو مسئله‌ني بئله جانلانديرير “اساطير و باياتيدا (ائله‌جه‌ده دئمك اولار خويراتدا ـ م.ع.ف) ناغيلدا و داستاندا ابدي له‌شن و جانلي يادداشا چئوريلن، هئچ كسين سويونو، اصليني، ذاتيني اونوتماغا قويمايان، اونو پارچالانماقدان خلاص ائدن، شعوردا، دوشونجه‌ده، معنويتده خلقين بوتؤولويونو تأمين ائدن ده فولكلور اولموشدور”. عراق توركمانلاري نين زنگين و چوخ ساحه‌لي فولكلور و شيفاهي خلق ادبياتي‌نين توپلانماسي و آراشديريلماسيندا بو خلقين اؤز ايچرسيندن چيخميش “عطا طرزي باشي” و آيري علم و مدنيت بيلگينلري نين بو قيمتلي خزينه‌ني دوغرولدوب اوزه چيخارتماسي نه قدر دگرلنديرمگه لاقديرسه، آذربايجان جمهوريتي فولكلورشناس پروفسور غضنفر پاشايف‌ين آرديجيل و يورولماق بيلمه‌ين چاليشمالاري دا بير او قدر قيمتلي اولموشدور سوز يوخ كي بو دورومدا معروف شاعير، رسول رضا كيميلرين آتديقلاري آدديملاري كولگه‌ده بوراخماق اولماز. لاكين غضنفر پاشايفين، سايي بلكه ده اون دانا دان چوخ اثرلري آراسيندا، اؤزه‌لليكله ايكي سانباللي اثري: بيري “كركوك فولكلورو آنتولوژيسي” و او بيريسي “عراق ـ توركمان فولكلورو” آشاغا ـ يوخاري ايكي اكادميك اثر سويه‌سينده‌دير. اوزون چاليشما و آراشديرمانين يئتيرگيسي اولان بو ايكي اثر، بير يؤندن كركوك فولكلورونون چوخ چئشيدلي و رنگارنگ ساحه‌لرينه ايشيق ساچسادا، بير آيري يؤندن بو فولكلورون دوغماليغينا و خلقي ليگينه آيدين و اؤيره‌ديجي اراشديما يوللاري آچير.


سيز “كركوك فولكلورو آنتولوژياسي” اثري نين نشريات طرفيندن يازيلديغي ييغجام آچيقلامادا اوخويورسونوز “كركوك فولكلورو آنتولوژياسي” كيتابي اوزون ايللرين ثمره‌لي زحمتي سايه‌سينده يارانميشدي. كيتابدا توپلانميش باياتيلار، خالق ماهنيلاري، اتالار سؤزلري، مثللر، تاپماجالار، داستانلار، لطيفه‌لر و سايره عراقدا ياشايان آذربايجانليلارين (توركمانلارين) تاريخيني طالعيني، پسيكولوژيسيني، عادت و عنعنه‌لريني، ايسته‌ك و آرزولاريني ايفاده ائدن سؤز اينجيلري دير … . سونرا اثرين “فولكلوروموزون قدرتلي قولو” باشليغي آلتيندا مؤلف طرفيندن يازيلميش احساسلي باشلانيشدا اوخويوروق: “بيلميرم هاراليام، تورپاغيم، داشيم غريب” دئيه‌ن بو ائلاتين ـ عراقدا ياشايان، سايي آلتي يوزميندن آرتيق اولان كركوكلولارين طالعي ايله باغلانديغيم 1963 ـ نجي ايلدن بو گونه قده‌ر كركوك فولكلورونون زنگينليگي مني مفتون ائتميش، سحر ائله‌ميشدير. او واخدان بري بو غير عادي خالق مودريكليلي گينين افسونو اصل محبته چئوريلميش و (اونلارلا اثر، مقاله و آراشديرمانين يارانماسينا سبب اولموشدور ـ مؤلف بونلاردان بير به بير آد چكر) بو خالقين فولكلورو ائله زنگين بير خزينه، ائله بير عوممانديركي، اونون درينليگينه باش ووران چتين كي، بيرده اوندان آيريلا بيلسين. بورادا اينسانين قلبيني ديققته گتيرن، خالقين عصرلرله ياراتديغي، گؤز ببگي كيمي قورويوب ياشاتديغي سايسيز ـ حسابسيز اينجيلر واردير … .


سونرا مؤلف اثرينده بؤلگه‌نين و اورادا ياشايان خالقين آذربايجان ادبي ديلي نين تأثير دايره‌سيندن كناردا قالان كركوك ديالكتي و كركوك فولكلورونون تاريخي گليشمه‌لرده بير سيرا ديل و حتي فولكلور عونصورلري نين ياديرقانماسينا، دگيشگينگيله‌لرينه معروض قالاراق اونلارين يئرينه يئني عونصورلرين اورتايا چيخماسينا ايشاره ائدير و بونلارين ايزلري‌نين قالديغينا فاكتلارلا تأكيد ائدير. بو اونودولموش و دگيشگن عونصورلر قاليرسا، يا قالمازسادا بئله كركوك ديل و فولكلورو قورولوش، آنلام و پسيكولوژيك پوتانسيل باخيميندان اؤزونو قوروموشدور و بيز ديالكتين و فولكلور چئشيدلري‌نين آراشديرماسيندا آشاغا ـ يوخاري بو عئيني ليگي دويوروق.


صابرله گؤروش


عراقدا بير شهر وار: كركوك


بيزيم كيمي دانيشيرلار اوردا


گاه توركمن دئييرلر اونلارا


گاه گلمه ، گاه تورك


باياتيلاريندان دئييم بيريني


اؤزونوز آچارسيز بو


بو بيلمه‌جه‌نين سرّيني


“عزيزم اوخوياندي


يار كيتاب اوخوياندي


اوخ آتدي مني وورسون


سينمده اوخو ياندي”


آدين دگيلسه مسئله


بير سؤزوم ده وار هله


كركوكدا كيتاب مغازاسينا گئتديم


آذربايجانا سوروشدوم؛ عمي


كهنه دن، تازادان نه‌يين وار؟


جاواب وئردي: تاپيلار


ان قيمتلي كيتابلاريميز بورادادير


آشاغيدان اوچونجو قفسه


كيتابلاري آراشديرديم بير نفسه


گؤتوردوم اونو، قويدوم بونو


حورمتله بير ـ بير


بيردن حئيرت آلدي مني


بو نه دير؟ شيروانلي صابر


گؤزومه اينانماديم


آچديم “هوپ ـ هوپ نامه” ني


بير سئوينج بير غرور حسي


قاناديندا قالديردي مني


خوش گؤردوك عزيزيم!


محنتلي عؤمورنون واراقلاري


بو دردلي ائللردن گليب، چيخيب


سني بورادادا اوخويورلار


بوندان آرتيق اؤلومسوزلوك مي اولار،؟


قوجا گؤردو هيجانيمي


ياواشدان دئدي: عزيز قوناق!


هانسي كيتابي ايسته‌سن قورباندير


آنجاق صابري ايستمه


هرگون


نئچه آدام گلر اونونچون اوستومه


دئميشم ساتمارام “هوپ هوپو”


كيم اونو سات دئسه


ائله بيل اوره‌ييم يئريندن قوپور


اليمي اوزاتديم


دئديم: ساغ اول عمي!


ائله بيل باغيشلادين منه


سئوينج دولو بؤيوك عالمي

0 Comments:

Post a Comment

Subscribe to Post Comments [Atom]

<< Home