ايران توركلرين‌ده آتالار سٶزونون توپلانماسي، نشري و قلمه آلما تاريخي
نوت: بو يازي، طرفيميزدن –يازيم باخيميندان- ائديت ائديلميشدير. مئهران باهاري
رضا همراز
Email: r_hamraz@yahoo.com
توركون مثلي، فولكلورو دونيادا تك‌دير
خان يورقاني، كند ايچره مثل‌دير ميتيل اولماز
اوستاد شهريار
توركون مثلي فارسين غزلي
بير آتا سٶزو
باش اوجا خالقيميزين شيفاهي ادبيياتي‌نين بول، بول ژانرلري و نووع‌لاري واردير. باياتيلار، تاپماجالار، اوخشامالار، نازلامالار، اويونلار، لايلالار و عنعنه لر اونلارين كيچيك ميقياسدا اولان بير حيصصه لري‌دير. بونلاردان علاوه «آتالار سٶزو» شيفاهي ادبيياتيميزدا اٶزونه اٶزه ل بير يئر آچميشدير. خلقيميز بونلاري سئوه-سئوه اوخويوب، سينه دن سينه يه ان اسكي چاغلاردان بوگونه كيمي قورويوب بير ده يه رلي امانت كيمي بو گونكو و صاباحكي نسيل‌لره چاتديرميشلار. بونلار ائله سئويلميش و منيمسه نيلميشلر كي، شهه رلردن و كندلردن علاوه محلله لرده ده بعضي واريانت‌لاري آزاليب، چوخالميشدير. اٶرنه ك اولاراق بير سيرا يئرلرده دئييرلر: «آشين سويوخلوغو ده نين يوخسوللوغونداندير» حالبو كي، بيز تبريزلي‌لر دئيه ريك، آشين دورولوغو ده نين اولماماسيندان يا(يوخلوغوندان) دير. بورادا قصديم يوخدور كي بيز دوز دئييريك يا باشقالاري، آمما دئمك ايسته ييره م كي، آتالار سٶزو خالق طرفيندن چوخ چوخ سئويليب ايشله ديلمه سينه اساس، نئچه دون‌دا ده ييشميشديلر. بورادا بير آنلام دا بلله نير. او دا بو كي، بونلارين ايفالاري چوخ‌دور و خالق بونلاري چوخ سئويب و اونا گٶره هم توي‌لاريندا ايشله ديرلر، هم ياسلاريندا، هم ده دانيشيقلاريندا. بيزيم «آتالار سٶزو» چوخ گومان كي باشقا خلق‌لرين آتالار سٶزوندن درين‌دير. اٶرنه ك اوچون فارسجا چوخ ايشله نه ن «مرغ همسايه غازه» سٶزونه باخاندا گٶروروك، هئچ واخت قونشونون تويوغو غاز اولا بيلمه ز. آمما بيزده بول-بول ايشله نه ن «قونشو آشي ايچمه لي اولار» سٶزو واقئعيتت‌د‌ن قيراقدا اولا بيلمه ز. بو ميثال‌دان آيدينلاشير كي، بيزيم آتالار همه شه سٶزلرين حئساب-كيتاب ايله دئييب و بيچيم‌سيز سٶز ايشله تمه ميشلر.
آتالار سٶزلريندن زامانين گئديشاتي دا تاثيرلي اولموشدور. بو ظاهيرده كيچيك معنادا بٶيوك سٶزلر گاهدان اسكيليب، گاهدان ايسه آرتيريلميشلار. حتتا بير سيرا شاعيرلرين بير بئيتي يا ميصرعي اصلن ضرب المثل كيمي ده اولموشدور. البتته بونون ترسه سي ده اولابيلميشدير. بير جومله نين كي معنا و آنلامي چتين نظره گلير آز دئييليب و ياواش-ياواش اورتادان قيراغا چيخميشدير. بونون عئينين بوگون الده اولان «آتالار سٶزو» كيتابلاريندا آيدينجا گٶرمك اولار. آتالار سٶزلرينده دونيالارجا سٶز-صحبت‌وار. بو ظاهيرده كيچيك آنلام‌دا بٶيوك سٶزلرده بديعي و يئني فيكير و دوشونجه لر، ديني و اخلاقي آنلاملار، ديري‌ليك طرزي، ديل‌چيليك، تاريخ و... دولودور. بو سٶزلرين ايزلريني و آياق يئرلريني تاريخده گٶرمك مومكوندور. آتالار سٶزو هر ميللتين روحييه سي، فرهنگي، كيم‌لييي، تاريخي و ساييره سينين آيناسي‌دير. بونلاري يارادانلارين بو گونه قده ر 99 فاييزي هله ليك تانينماميش‌دير. بلكه ده بونلارين ياراديجيلاري ائله بو مساله يه ياناشديقدا دئيب‌لر كي، سٶز صاحيبي اٶلسه ده، سوز قالار.
بو كيچيك، گٶزه ل و قيسا سٶزلرين گوزه ل‌ليك‌لريندن بيري ده باشقا ديل‌لردن تاثيرله نيب بير آيري ديله تاثير قويمالاري‌دير. بونلاري بير آز فرقلي باشقا ديل‌لرده گٶرمك مومكون اولور. اٶرنه ك اوچون «بير گول ايله باهار اولماز» مثلي‌نين منشايي و كٶكو بللي دئييل و اوست اوسته بير چوخ ديل‌لرده و فرهنگ‌لرده دئييلير. عالم‌لريميزين يازديقلارينا گٶره آتالار سٶزو «حياتين موختليف مساله لرينه عاييد عيبرت‌آميز مضمونلو قيسا كلام، حيكمتلي سٶزلر، خالق مودريك‌لييي‌نين بديعي ايفاده سي، خالقين دوهاسيني، يا خود خالق مودريك‌لييي‌نين، خالق ذكا و دوشونجه سيني، خالقين حياتي تجروبه لرينين نتيجه لريني باشقا سٶزله خالقين عمومي‌له شديريلميش تجروبه سيني عكس ائتديره ن، خالق دونيا گٶروشونون، اونون عملي حيات فلسفه سينين خولاصه سي، قيسا و دولغون، ييغجام و معنالي بير شكليلده آفوريزملر حاليندا ايفاده سي، ايجتيماعي تاريخي حقيقت‌لرين بديعي ايفاده سيندن عيبارت اولان، سون درجه ييغجام، كونكرئت حكيمانه آفوريستيك ايفاده لردير.»
بيلديييميزه گٶره آتالار سٶزونون يازي‌يا آلينما تاريخي، اسكي بير تاريخه قاييدير. اورخون يئني سئي آبيده لرينده بو حيكمتلي سٶزلردن ايزلر وار. داها سونرالار تورك دونياسينين اٶيوندويو كاشغرلي محمود، ده يه رلي كيتابي ساييلان «ديوان لغات الترك» اثرينده بونلارين 300 دن چوخونا يئر آچميشدير. هابئله، عتبه الحقايق، قوتادغوبليك، دده قورقود، كوراوغلو و خالق داستانلاريندا دا آتالارسٶزونه بول-بول راستلاشماق اولور. بونلاردان علاوه شاعيرلريميزين شئعرلرينده ده گئنيش بير يئر آچيلميشدير. شاعير علي توده آتالار سٶزونه يئتيشه ركن بئله قلم اله آلير:
هره بير يول سئچدي ساربانلار كيمي
آتالار سٶزونه وورولدون سن ده
سينه سي دالغالي عوممانلار كيمي
گاه جوشدون گاه دا كي، دورولدون سن ده
* * *
گزدين هر داغيندا هر دوزونده سن
دوغما ديياريندا دفينه تاپدين
صرراف آتالارين بير سٶزونده سن
اينجيلرله دولو، خزينه تاپدين
* * *
دئ شكردن شيرين آتالار سٶزو
هانسي ايشيميزه اولفت اولماييب
سٶيله، گٶيدن درين آتالار سٶزو
كيمه درس وئرمه ييب عيبرت اولمايب؟
* * *
عٶمرون فصيل-فصيل باشا دولدوقجا
حيكمت سوراغيندا چئويك‌له شيب‌سه ن
مودريك آتالارا بلد اولدوقجا
اٶزون ده حياتدا مودريك‌له شيب‌سه ن
* * *
آتالار سٶزونده نغمه لر تكي
وطن عولويله شير، ميللت دانيشير
آتالار سٶزونده چئشمه لر تكي
محببت چاغلايير، غئيرت دانيشير
* * *
هر، قيز نيشانيميز، اوغول تويوموز
آتالار سٶزو ايله زينت‌له نيب‌دير
ايستي چٶره ييميز، سرين سويوموز
آتالار سٶزو ايله قيمت‌له نيب‌دير
* * *
حلال‌دير امه يين، كشفين عذابين
كٶوره ك آتالارا، سرت آتالارا
آتالار سٶزو ايله دولو كيتابين
عزيز خاطيره دير مرد آتالارا
آتالار سٶزونون توپلانما تاريخي و موده وون اولماسي صفوي دٶورونه قاييدير. محممد جبله رودي كي هيندوستاندا سولطان عبدوللاه قوطب‌شاه ساراييندا ياشاييردي آتالار سٶزونون توپلانماسينا دايير يازير: «بير گون بير مجليس‌ده ضرب المثل‌دن سٶوز گئتدي. دانيشيق توركجه و عربجه ده اولدو. بير نفر فاضيل‌لردن كي او مجليس‌ده وار ايدي دئدي، شاه عابباس´ن امرينه گٶره توركجه آتالار سٶزون بير يئره توپلاميشديلار. حالبو كي بير كيمسه فارسجا آتالار سٶزونون توپلاماسينا قول قويماميشدير»
آتالار سٶزو- توپلولاري‌نين هاميسي، دئييم‌لر، دويوملار، مثللر، ايصطيلاحلار و... ايله دولودور. «آتالارسٶزو» قيسا بير جومله لردن‌عيبارت‌ديرلر كي، ايجتيماعي بير ايش‌لري آنلادارلار. اٶرنه ك اولسون دئيه «كور كورا نئجه باخار، ا... اونلارا اوجور باخار»- ي گٶسته رمك اولار. بونلارين اوزون قيسالاري دا اولار.
آناسينا باخ قيزين آل
قيراغينا باخ بئزين آل
آتالار سٶزلرين توپلايانلار تاسسوفله هامي‌لاري، آتالار سٶزلري ايله دئديييميز كيمي مثل‌لري، دئييم‌لري، دويوملاري، ايصطيلاحلاري و... قاتيشديرميشلار. بير حالدا كي، بونلارين هره سينين اٶزونون يئري اولموشدور. دئديييميز كيمي بونلار حيكمتلي سٶزلردن عيبارت‌ديرلر كي، نسيل‌لر بويو، تجروبه لر اساسيندا مئيدانا گلميشلر. بايرام طاهير به ي اووا، ابوالقاسيم حوسئين‌زاده نين توپلاديغي آتالار سٶزونه يازديغي اٶن سٶزده 30 دان يوخاري بونلارين نووع و ژانرلارين ذيكر ائدير. مقاله ميزين سونوندا ايران تورك‌لري ايچره آتالار سٶزونون توپلانماسي، نشري و قلمه آلينما تاريخينده كي يازيميزي كي 3 حيصصه يه بٶلموشوك بو سيرا ايله تقديم ائديريك.
1- ايراندا چاپ اولان و يا ايران تورك‌لريندن ايشله يه ن و چاپ اولان آتالار سٶزو
2- توپلانان «آتالار سٶزو» توپلولاري‌نين چاپ اولمايانلاري
3- موتفرريقه توپلولاردا آتالار سٶزو
1-1 امثال توركانه
الده اولان و عئلم عالمينه تانينان ان اسكي آتالار سٶزو توپلوسودور كي، بير جنوب آزربايجانلي طرفيندن ميلادي 17 ينجي عصرين سونلاريندا و 18 ينجي عصرين ايلك چاغلاري ماراغالي عابباس قولو´نون «امثال-ي توركانه» سيدير. بو كيتاب بير اليازما كيمي قورونسا دا، خوشبخت‌ليك‌له ميلادي 1996 ينجي ايل باكي´دا رسول اوغلو بٶيوك´ون تشببوثي ايله چاپ و يايينلاندي. بو كيتابين بيرينجي مثلي بئله باشلانيب "آللاه وار، رحيمي ده وار" و "كٶپه كين كٶنلو كٶپك‌له ن خوش اولور"لا بيتير.
2-1 «دستان داستان»
«دستان داستان» فارسجا توركجه و عربجه بير متن‌دير كي - فراهانلي ابوالقاسم اوغلو علي اكبر´ين هيممتي ايله قمري 1322 ده يازيلميش - قورتارميش‌دير. همين كيتاب 1378 ينجي ايلين پاييزيندا دوكتور رحيم چاوش اكبري´نين هيممتي ايله تئهراندا 741صحيفه ده ايشيق اوزو گٶردو. بو كيتاب كي سهو اولاراق آدي «نامه داستان گلميشدير، دوكتور چاوش اكبري´نين دوكتورا پايان‌نامه سيدير. فراهانلي علي‌اكبر جوما گونو صفر آيي‌نين 27 ينجي گونو 1269دا فراهان´ين «ساروق» قصبه سينده آنادان اولموش و 60 ايل عومور سوردوكده وفات ائتميشدير. او «دستان داستان» كيتابيندا بير چوخلو توركجه آتالار سٶزونه يئر وئرميشدير. همين كيتابين توركجه مثل‌لريندن بير نئچه سينه كيفايت ائديريك.
1- اود هر يئرده دوشسه اٶزونه يئر آچار.
2- بير دلي قويويا بير داش سالار، يوز بيليجي چيخارتا بيلمه ز.
3- پيشيگين آغزي اته چاتماز، دييه ر ]پيس[ اييي وار.
4- ايت هوره ر كروان گئچه ر، ايته هورمك قالار.
5- اوزووه اينه باتير، يولداشيوا (جوالدوز)
6- گوودوش گوودوشا ده يه نده، اوزون قره اولسون سوپايا اوزون تنديره سالي خجالت‌دن.
3-1 امثال حكم در زبان محلي آزربايجان
آدي اوسته وئريله ن بو كيتاب 50 ايل بوندان اول 1332 ده رحمتلي علي اصغر مجتهدي´نين هيممتي و تثببوثي ايله كي 2500 هنده ورينده آتالار سٶزونو ائحتوا ائدير تبريز´ده ايشيق اوزو گٶره بيلدي. بو كيتاب دٶنه، دٶنه تبريزده چاپ و هابئله 1985 ده بركلي‌ده دوكتور حسن جوادي و ايلهان باشگٶز´ون اون سٶزلري ايله يايينلانميشدير. جنوب آزربايجان´دا چاپ اولان بو ايلكين «آتالارسٶزو» توپلوسو "آينايا نئجه باخسان اٶزووي هايله گٶره رسن"، سٶزو ايله باشلانيب و "ييه ن ايله گييه نين كين آللاه يئتيره ر" ايله، 286 صحيفه ده چاپ اولموشدور.
«امثال و حكم در زبان محلي آزربايجان» سون ايللر تبريزده «توركي ديلينده مثللر» آدي ايله يئني‌دن باسيلدي. رحمتلي مجتهدي بو كيتابدا گله ن آتالار سٶزونون فارسجايا ترجومه سي ايله برابر بير سيرا شئعرلري ده قئيد ائديب.
4-1جامع التمثيل
همين كيتابي توپلايان ماكي‌لي حاج محمد رحيم نصرت الملك´دير كي بو آتالار سٶزون گونه ش ايلي 1334 ده چاپ ائتديره بيلميشدير. جامع التمثيل كيتابي "آللهينان سازلاشان هامي‌نان سازلاشار" سٶزو ايله باشلانيب و "شوراكنده توخوم سپ‌مه" ايله 25 ينجي صحيفه ده باشا چاتيب و ايكينجي فصلي «از هر چمن گلي» آدي ايله 23 ينجي صحيفه دن فارسجا باشلايب و 36ينجي صحيفه ده سونا چاتير. دئمك بو كيتابين توركجه بٶلومو فارسجادان چوخ اولموشدور.
5-1آتالار سٶزو يا گفتار نياكان
رحمتلي يعقوب قدس´ون توپلاديغي و اوچ مين هنده ورينده اولان بو كيتاب 1359 ينجي ايلين پاييزيندا تئهراندا نشر نويد طرفيندن چاپ اولموشدور. چوخ تاسسوف‌لر اولسون كي بو كيتابين ايكينجي جيلدي يازانين وفاتي ايله ايشق اوزو گٶره بيلمه دي. آنجاق وارليق درگيسينين 79ينجي ساييسيندا بير موشتولوق كيمي او كيتابين قالاني‌نين وئريلمه سي ذيكر اولاراق بير بخشي ده وئريلدي آمما يازيقلار اولسون كي آردي كسيلدي. بو آتالار سٶزونون باشقا كيتابلارا گٶره فصيل‌لري ايناملار، يئييب ايچمه لر و... بٶلمه لري‌دير كي اٶزلويونده ائنتئرسان‌دير. يعقوب قدس´ون آتالار سٶزو كيتابي "آتاما ياتاق سالديم، گلدي قالايچي ياتدي" سٶزو ايله باشلانيب و "يوموشاق يئرين بئل‌داريدير" مثلي ايله بيتير. بو كيتابدا مثل‌لرين فارسجا آنلاملاري وئريليب.
6-1آتالار سٶزو، عقلين گوزو
همين كيتابي دا ادبيياتيميزين يورولماز آراشديريجيسي دوكتور حسين فيض‌الهي وحيد 66 ينجي پاييزيندا تبريزده نشرينه مووففق اولموشدور. «آتالار سٶزو، عقلين گوزو» فارسجا 25 صحيفه ليك اٶن سٶز ايله برابر 5 صحيفه ده توركجه موقدديمه ايله چاپ اولموشدور. بو 109 صحيفه ليك كيتاب "آت ، آت اولونجا، صاحابي مات اولار" سٶزو ايله باشلانيب، و "يولدا يولداش، ائوده قارداش" سٶزو ايله سونا چاتير.
7-1 آتا بابالار دئييب‌لر
بو كيتاب 1370 ينجي ايلين ياي فصلينده تبريزده علي ظفرخواه´ين هيممتي ايله ايشيق اوزو گٶره بيلميشدير. 74 صحيفه دن‌عيبارت اولان «آتابابالار دئييب‌لر» كيتابي "آج آپارار سوسوز گتيره ر" سٶزو ايله باشلانيب و "يييه ن كيم ايچه ن كيم" سٶزو ايله بيتير. بو كيتابلا بوتون آتالار سٶزو و ايصطيلاحلارين فارسجا ترجومه سي وئريليب.
8-1ضرب المثل‌لر
بو آدي ايله تانينان كيتاب 74 ينجي ايل تبريزده زهره خانيم وفايي´نين هيممتي ايله 215 صحيفه ده چاپ و يايينلانميشدير. زهره خانيم´ين ترتيب وئردييي بو كيتاب "آباد اولاسان خالخال، بيري ياتار بيري قالخار" مثلي ايله باشلاييب و "يورك دانا نوختاسين قه ييم ائده ر"له سونا چاتير. آتالارسٶزو حاققيندا بو كيتابدا نه بير ترجومه و نه بير ايضاح ذيكر اولونمايب.
9-1آتالار نقلي
توركمن‌جه ايشق اوزو گٶره ن «آتالار نقلي» كيتابين مراد دردي قاضي 1376 ينجي ايلينين پاييزيندا چاپا يئتيرميشدير. بو 175صحيفه ليك كيتابدا آتالار سٶزونون يالنيز متن‌لري وئريليب و هئچ بير ترجومه ذيكر اولونماميشدير. آتالار نقلي، حاجي طلايي ناشيرلييي طرفيندن چاپ اولموشدور.
10-1 ائل سٶزلري- توپلايان محمدحسن يوسفي، 1377 تئهران
بو كيتاب دئمك خمسه ماحالينين آتالار سٶزون ايفا ائدير. بو آتالار سٶزونون باشقالارينا مزييتي بو اولا بيله ركي، كيتاب ايكي اليفبادا اوخوجويا سونولور. عرب كٶكلو تورك اليفباسي و لاتين گيرافيكاسي. بو اثرين 225 صحيفه عرب اليفباسي ايله و 56 صحيفه سي ايسه لاتين گيرافيكاسي ايله چاپ و ياينلانميشدير كي عرب اليفباسينداكي سٶزلر فارسجايا ترجومه لرينه ده يئر وئريلميشدير. بيرينجي مثل "آت اولور ميدان اولماز، ميدان اولور آت اولماز" سوز ايله باشلانسا دا، 1478 ينجي مثل "يوز دانا پچاخ دوزلتسه بيرينين دسته سي اولماز" ايله باشا چاتير.
آتالار سٶزو- قاشقايي توركجه سينده ضرب المثل‌لر
11-1 بو ده يه رلي كيتابين توپلاياني «اسداله مرداني رحيمي»دير كي 1378 ينجي ايلده 245 صحيفه ده نشر اولموشدور. آتالار سٶزو كيتابي "آبي دونوم پيريلار، باغيرساغيم قورولار" مثلي ايله باشلانيب و "يئنگي يوردا گئده نده، كهنه يوردونگ قدريني بيلدنگ"له باشا چاتير. قاشقايي آتالار سٶزونون قاباق قارشي‌سيندا اونلارين فارسجا ترجومه لري ده وئريلميشدير.
12-1دويست و بيست ضرب المثل
بٶيوك محبي´نين توپلاديغي 220 ضرب المثل 79 ينجي ايل اوجا و قوجا تبريزده 30 صحيفه ده نشر اولموشدور. بو كيتابدا مثللر اساس فارسجا و انگليس‌جه وئريلسه لر ده آنجاق آراسيرا توركجه لره ده يئر وئريلميشدير.
13-1 فرهنگ ضرب المثلهاي افشار آزربايجان
"آزربايجان افشاري‌لاري‌نين ضرب المثل سوزلوگي" آدي ايله گئده ن بو كيتابي علي محمدي برنجه 79 ينجي ايل 293 صحيفه ده تئهراندا نشر ائتميشدير. بو گٶزه ل كئيفييت‌ده چاپ اولان كيتابدا اٶنجه، مثلين اٶزو، سونرا لاتين‌جه سي و داها سونرا فارسجا آچيقلاماسي وئريلميشدير. فرهنگ ضرب المثلهاي افشار آزربايجان "آت مينه نين تانييار" ايله باشلايب و "يئييله نيم يئييلدي، داغيلانيم داغيلدي، قوناغيم گلدي، گئتدي" سٶزو ايله ده سونا چاتير.
14-1آتالار سٶزونون اينكيشافي
بو تدقيقي ايشي سورگون تخللوص‌لو محرم پريزاد ايشله ميشدير. بو اثرده يازار، محمود كاشغري´نين ديوان الغات الترك اثرينه اييله نه ره ك 233 آتالار سٶزون اوندان چيخاريب و بو گونكو ايشله له ن موعاديل‌لري ايله برابر 80 ينجي ايلده تبريزده 248 صحيفه ده چاپا يئتيرميشدير.
15-1 آتالار سٶزو
«آتالار سٶزو» باشليقلي بو كيتابي قوزئي بٶيوك فولكلورچوسو ابوالقاسيم حوسئين‌زاده ايللر اه وول توپلاميش و اوتايدا چاپ اولموشدور. آنجاق 1381 ينجي ايلده همين كيتاب جاويد كبير قاسمي´نين هيممتي ايله كٶچورولوب 289 صحيفه ده تبريزده ايشيق اوزو گٶره بيلميشدير. بو كيتابدا "وطنه گلديم، ايمانا گلديم" سٶزو ايله باشلانميش و "مين خالا ييغيلسا، بير آنانين يئرين وئرمه ز"له سونا چاتير.
16-1يوردومون ده يه رلي سٶزلري
يوردومون ده يه رلي سٶزلري´ني فرنگيز خانيم حاجي ستاري، دئدييينه گٶره گنج چاغلاريندان توپلاميش و نهايت 1382 ينجي ايلده 264 صحيفه ده چاپ و يايينلانميشدير. بو كيتابدا آتالار سٶزونون بير سيراسي اونلارين فارسجا ترجومه سي ايله برابر وئريلميشدير. كيتاب "آباد اولاسان خلخال، يئل ياتار گرميش قالخار" مثلي ايله باشلانميش و "اولويه رحمت يئتيشه ر"له سونا چاتير.
آتالار ناقلي
17-1 توركمن‌جه اولان بوآتالار سٶزون، گنج آراشديريجي، مهندس مشهدقولو قيزيل 82ينجي ايلين باهار فصلينده تئهراندا اولان انديشه نو ناشيرلييي هيممتي ايله 118 صحيفه ده نشر ائتديره بيلميشدير. مشهدقولو قيزيل´ين «آتالار ناقلي» كيتابي ايكي اٶنسٶزدن سونرا «آبراي دوكولسه تاپيپ بولماز، ياغ دوكولسه ايييپ (=آليپ) بولماز» سٶزو ايله باشلانيب و نهايت «ييغيلسانگ بوكه دن ييقيل» مثلي ايله بيتير.
18-1 آتالار دئييب‌لر
«آتالار دئييب‌لر» باشليقلي A4 اندازه سينده اولان جوزوه ني تبريزده، حسن به يگ هادي توپلايب 20 صحيفه ده 1382 ينجي‌ايلين پاييزيندا نشر ائتميشدير. بو كيتاب لاتين آلفابئتينده يازيلميش و ايكي مين‌دن زيياده آتالار سٶزونو ائحتيوا ائدير. حسن به يين توپلاديغي آتالار سٶزو، «آج آيي اويناماز اوغول» سٶزو ايله باشلايب و «زورناچينين گوز نئيينه گره گ‌دير» ايله باشا چاتير.
1-2 ادب خزينه‌سي
ادب خزينه‌سي آدي ايله نشر اولان بو فولكلور مجموعه سي 1359دا تئهراندا شانجانلي علي اصغر خرم ين تثببوثو ايله 380صحيفه ده چاپ و يايينلانميشدير. بو مجموعه ده باياتي، عاشيق پوئزيياسينا دايير شئعرلر، كيلاسيك شئعرلر و... بول-بول يئر آچيلميش و نهايت كيتابين 245 ينجي صحيفه سينده «آتالار سٶزو و ضرب المثل‌لر» عونواني ايله «آباد يئره سو گئده ر» ايله باشلاييب و نهايت «ييه نين و گييه نين پايين آللاه يئتيره ر» له سونا چاتير. خرم بو مجموعه ده 3700 حدودوندا آتالار سٶزونه يئر آچميشدير.
2-2 آزربايجان فولكلورو-(يئكانات منطقه‌سي منوقرافياسي اساسيندا)
بو ده يه رلي مجموعه ني مهندس مير هدايت حصاري جنابلاري 50 ايلدن بري توپلاديغي ماتئريياللارين اساسيندا توپلاميش و1379 ينجي ايلده تابان و شهريور ناشيرلري واسيطه سي ايله چاپ عرفه سينده چاتديرا بيلميشدير. بو فولكلور توپلوسوندا 1087 آتالار سٶزونه ده ماراقلار يئر وئريلميشدير. بيرينجي آتالار سٶزو، "آت آت اولونجا، يييه سي مات اولار"لا باشلاميش و سونونجوسو ايسه "ييخيلانين داليسيجا داش آتان چوخ اولار"لا قورتولور.
3-2دنياي سبز آذري زبان‌ها
فارسجا متني اولان بو كيتابي 79 ينجي ايلين پاييزيندا اصغر جدائي قوم شهه رينده 208 صحيفه ده «طاووس بهشت» ناشيرلييي طرفيندن چاپ ائتديره بيلدي. همين كيتابدا ماهني‌لار، نغمه لر، اٶيودلر، و ساييرلرله برابر آتالار سٶزونه ده يئر آچيلميشدير. بو كيتابين بيرينجي آتالار سٶزو بئله باشلانير "همسايه نين تويوغي نظره غاز گله ر-آدامين اوز مالي نظره آز گله ر" و "ائششه يه گوجو چاتمير پالانين دٶيور» ايله بيتير. همين كيتابين ماراقلي حيصصه سي بوندان عبارت‌دير كي، آتالار سٶزونون ايشله‌ندييي شهه ر مثلين اوستونده وئريلير. مثال اولاراق خسروشهري، ارموي، هشترودي، ماكي، تبريزي، قشقائي...
4-2 گٶيجه يازيلار
گٶيجه يازيلار عونوانين داشييان ادبي، بديعي مجموعه ده 1000دن زيياده آتالار سٶزو «ائلين سٶزو عاغلين گٶزو» باشليغي ايله حسن به يگ هادي و رحيم گٶزه ل´ين امك‌لري ايله قلمه آلينميش‌دير. «گٶيجه يازيلار» مجموعه سي 1382 ينجي ايل تبريز شهه رينده حسن به يگ هادي´نين هيممتي ايله 54 صحيفه A4 واراغيندا جوزوه شكلينده يايينلانميشدير. بورادا گله ن آتالار سٶزو "آت آي‌ليغين، دوه ايل لييين دوشونور" سٶزو ايله باشلانيب و "يينه سينه باخ، آتين ناللا" ايله بيتير.
5-2 تجريد اللغات
تجريد اللغات آدي ايله تانينميش نصابي حاج مصطفي اوغلو آخوند ميرزه علي بادكوبي قوشوب 1314 قمري ده تئهراندا چاپا يئتيرميشدير. همين نصابدا بول-بول آتالار سٶزونه يئر وئريلميشدير.
6-2ائل ديلي و ادبيياتي
هله بو گونه قده ر 7 جيلدي نشر اولونان ائل ديلي و ادبيياتي باشليقلي ادبي و بديعي مجموعه ده ده بير چوخ يئرلي آتالار سٶزونه ماراقلا يئر آچيلميشدير. بو مجموعه ده اردبيل، زنگان، خالخال، قاراداغ و سايير يئرلريميزده ايشله ديله ن آتالار سٶزلريندن اٶرنه ك‌لر وئريلميشدير.
[چاپ اولمايانلار]
1-3 آتالار سٶزو
بو كيتابي تبريزلي علامه مدرس، 8 جيلدليك ريحانه الادب صاحيبي» ترتيب وئرميشدير. علامه مدرس´ين 307 صحيفه ليك بو ده يه رلي كيتابي چاپ عرفه سينه چاتسا دا تاسسوفله چاپ اولماميشدير.
2-3آتالار سٶزو
«از صبا تا نيما» كيمي ده يه رلي مشروطه ادبيياتيندا يازيب، زحمتكش ژورناليست رحمتلي يحيي آرين‌پور دا ال يازمالاري ايچره بير دفترين‌ده «آتالار سٶزو» دولدورو. نه يازيق كي بو اثر ده اوستاد آرين‌پور´ون بير سيرا باشقا اثرلري كيمي هله ليك چاپ‌اولماميش‌دير.
3-3فيروز آبادين يئرلي ضرب المثل‌لري
بو كيتابي دا قاشقاي تدقيقاتچي‌سي اسداله مرداني رحيمي توپلاميشدير و آديندان بللي اولدوغو كيمي فيروزآباد´دا ايشله نه ن آتالار سٶزلرين ائحتيوا ائدير. «فيروز آبادين يئرلي ضرب المثل‌لري» تاسسوفله هله ليك چاپ اولماميش، آنجاق چاپ عرفه سينده دير.
4-3ريشه‌هاي تاريخي ضرب المثلهاي تركي قشقايي
بو چاپ عرفه سينده اولان كيتابي دا قاشقايي تورك‌لرينين قيغيلجيم آراشديريجيسي اسداله مرداني رحيمي توپلاميش و آديندان بللي اولدوغو كيمي قاشقاي تورك‌لرينين ضرب المثل‌لرينين تاريخي كوك‌لرين‌ي ائحتيوا ائدير.
5-3آتالار سٶزونون ايضاحي
بو چاپ اولماميش اثر ده جنوب آزربايجان تازاجا آللاهين رحمتينه گئده ن شاعير و عاليم‌لريندن بيريسي اولان رضا غفاري´نين ايدي. بو كيتابدا آتالار سٶزوندن يارانان حئكايه لر و يا اوز وئرميش ماجرالاردان تٶره نه ن آتالار سٶزوندن سوز گئدير. بو كيتاب چاپ عرفه سينه چاتسا دا، هله ليك ايشيق اوزو گٶره بيلمه ميشدير.
6-3 آتالار سٶزو
بو 17 مين حدودوندا اولان كيتابي توپلايان تبريز يازيچي‌لاريندان اولان احمد آذرلو ايللر بويو اؤزو ايله ساخلاسا دا، بير قيسمتي باكيدا نشر اولموشدور. آنجاق تاسسوفله قالان حيصصه سي هله ليك ايشيق اوزو گؤره بيلمه ميشدير.
7-3آتالار سٶزو
يئني‌جه آللاهين رحمتينه گئده ن قهرمان تخللوص‌لو تبريزلي حاج غلامرضا مجدفر´ين دئدييينه گٶره توپلاديغي آتالار سٶزونون بير حيصصه سي توركيه ده چاپ اولموش‌سا دا، گئنيش بير حيصصه سي هله ليك چاپ اولا بيلمه ميشدير.
posted by Mehran Baharlı at
11:07 AM
0 Comments:
Post a Comment
Subscribe to Post Comments [Atom]
<< Home