بير اويغور معراج نامه


نوت: بو يازي، طرفيميزدن –يازيم باخيميندان- ائديت ائديلميشدير. مئهران باهاري

ماشااله رزمي

اويغورادبيياتيندان بير يادگار
مين دٶرد يوزايل اوولدن ايندييه قده ر هامي ديللرده يازيلميش « مئعراج نامه » لردن، ميرزا شاهرخ تيموري´نين شاهليق زاماني اويغور خططي ايله تورک ديلينده يازيلان مئعراج نامه يقين ميثيلسيز بير شاه اثردير. مئعراج يا پئيغمبرين يددينجي گٶيه معنوي سفري ايسلام دينينين اووللرينده بير زامانا نيسبت وئريلير کي محممد موخاليفلرطرفيندن شيددتله تضييقاتا معروض قالميشيميش. بيرينجي دفعه مئعراج نامه عرب ديلينده ياريليب سونرالار موسلمان عاليملر اونو آيري ديللره ترجومه ائديبلر. اويغور خططي ايله يازيلان تورکي مئعراج نامه بير ادبي و هونري اثر اولالي اونون شکيللري، خطلري، رنگلري و اوندا اولان گئييملر و سمبوللار اون بئشينجي عصرين مدنييت و اينجه صنعتيندن بيزلره ساييسيز و حئسابسيز معلومات وئرير. بو کيتابي يازماغا عربي، تورکي و حاشييه لرينده فارس ديليندن ايستيفاده اولونوب و گٶسته رير کي ايسلام مدنييتي شرقده ياييلاندان سونرا عومومييتده، عربي دين ديلي، تورکي دربار و سيياست ديلي و فارسي شئعر و ادب ديلي اولوب و بو اوچ ديل تامام شرق مدنييتينده بير بيرينين کاميلله ده ني اولوب، مئعراج نامه´نين يازيلاري آلتون سويو، زعفران جٶوهري و چين موركکبي ايله بير نٶوع اعلا پشمدن (تيفتيک) دوزه لميش کاغيذ اوستونده يازيليب و ساغ ساليم قاليب و زامانين کئچمه سي اونون رنگلريني ده ييشه بيلمه ييب. بو قييمتلي اثرين اصل نوسخه سي فيرانسادا پاريس´ين ميللي کيتابخاناسيندا تورک قيسمتينين علاوه سينده 190 نومره ده ساخلانير. تورکي مئعراج نامه هيجري تاريخينين 840 نجي ايلي يعني کيريستييان تاريخييله ن 1436 نجي ايل ايندي افغانيستان´دا اولان هرات شهه رينده ميرزا شاهروخ´ون ساراييندا يازيليب، شاهروخ تئيمورلنگ´ين اوغلو هونرمند بير شاه اولوب و اونون زاماني خوراسان تورپاغي هونرپرور يئر اولوب. مشهد شهه رينده اولان تاريخي گٶزه ل آبيده « مسجيد گٶوهرشاد » شاهروخ′ون آناسي گٶوهر خاتون´ون مدفنيدير.

مئعراج نامه´نين هرصحيفه سينين باشيندا آلتون سويو ايله عرب خططي وعرب ديلينده او صحيفه ده اولان صحنه شرح اولونوب، اوندان آشاغي چين مورکكبي و عرب خططي ايله شرقي تورک (آزربايجان) ديلينده عرب سٶزلري ترجومه اولونوب آمما اصل يازي اويغور خططي ايله قارا، قيرميزي و آلتون رنگلرله کادرا سالينميش شکيللرين باشيندا ويا آشاغيسيندا چوخ ديققتله يازيليب. بو شاه اثري يارادان تورک ميللتلرينين بٶويوک صوفي شاعيري «مير حئيدر»دير و کيتاب «اوستاد ملک بخشي هراتي» هونرمند خططاط اليينه ن يازيليب، کيتابين شکيللريني ده بير نئچه تانيلمايان رسساملار چکيبلر. بو شکيللر «سبک-ي هرات» آدلانير. تئيموريلر دٶورو اوچ نققاشليق سبکي يارانيب، هرات مکتبي، تبريز مکتبي و شيراز مکتبي. هرات مکتبي مانوي و چين نققاشلاريندان ايلهام آلير، شيراز مکتبي ساساني نقشلردن تاثير گٶتورور و تبريز مکتبي شرقي روم مکتبلريندن ايلهام آلالي پئرسئپکتيولي نققاشليق يارادير. بيليريک کي کئچميش عصيرلرده رسساملار ناغيللارداکي پئرسوناژلاري اٶز موعاصير آداملاري شکلينده چکه رميشلر. تورکي مئعراج نامه´ده اولان بئهيشت اهاليسي و پئيغمبرلر و ملاييکه لر، شاهروخ´ون ساراييندا اولانلارا اوخشاييرلار و جهننم اهاليسي و جهننمده کي مامورلار شاهروخ´ون دوشمنلرينه بنزه ديليبلر. حوريلر هاميسي تورک و اويغور قيزلارينا بنزيرلر و پئيغمبرلر تورک گئييمي گئييب و بعضي پئيغمبرلرين و ملاييکه لرين باشيندا تورک تاجي وار. محممد پئيغمبرين و جبرييل ملکين باشلارينين اطرافيندا موقددس شٶعله وار. بو نيشان رسساملارين مانوي اولدوغونو بيان ائدير. چونکو مانويسم´ده و مزداييسم´ده اود موقددس و پاک ائيله يه ندي. اويغور خططيني مانويلر مرکزي آسيادا ياييبلار. بو خطط اسگي آرامي اليفباسيندان ايقتيباس اولونوب.

اويغورلارين 744 دن 840 نجي ايله قده ر آسيانين شوماليندا ايمپاراتورلوقلاري اولوب و تورک ديلينده بيرينجي ادبي اثرلر ده اويغور خططي ايله يازيليب، سونرالار اويغور خططي و اويغور کولتورو، تورک و موغول مدنييتينين اينکيشافيندا دوققوزونجو عصردن اون بئشينجي عصره قده ر چوخلو اثر قويوب. «آنتوان گالان» مين بير گئجه ناغيللاريني فيرانسا ديلينه ترجومه ائيله يه ن شخص، تورکي مئعراج نامه´ني اٶوز تحقيقات سفرينده 1673 نجي ايلده ايستانبول شهه رينده بير نفر کيتاب ساتاندان آليب و فيرانسايا گتيريب. بو کيتاب چوخ يئرلري گزه ندن سونرا آخيرده گليب پاريس´ده ميللي کيتابخانايا چاتيب. اويغور خططي ايله يازيلميش مئعراج نامه´نين آلتميش بئش صحيفه سي (25 سانتيمئتر اني و 50 سانتيمئتر بويو) و آلتميش بير ان گٶزه ل تابلوسو وار. بوتون اورتا عصرلرده اويغور خططي ايپه ک يولوندا (ابريشم جادده سي) اوخونوردو و تاجيرلرين حئساب کيتاب خططي ساييليردي. ايندي ده ايران´دا قديم ساوادي اولانلار اويغور خططي (ساياق) يازاللار. اويغور مدنييتي اورتا عصرلرده ايران مدنييتينده چوخلو يادگار قويوب، تئيموريلر دٶورونده اويغور ديلي ساراي ديلي اولوب، شاهروخ و اونون اوغلو بايسونقور هونرپرور اولوبلار و اويغورلار اليينه ن چين مدنييتيني ايران´ا گتيريبلر و فارس شاعيرلرينين شئعرينه قاتيبلار (لعبت چين، نقاش چين، مشگ ختن، ترکان ختا و... ) آمما تاسسوفله موعاصير ايللرده فارس ديلينده يازيلان تاريخلرده اويغورلاردان و اونلارين ايران´دا قويدوقلاري يادگارلاردان آد گتيريلمير.

3 _ 11 _ 2003