Thursday, June 01, 2006



شاه ايسماعيل ختايي′نين آزربايجان توركجه سينده تاثيري


يازان:م.جواداووا

کؤچوره ن: رعنا رنجبر

16 عصرين بيرينجي ياريسيندا آذربايجاندا صفويلر خانداني آدي ايله قودرتلي دؤولت قوران شاه اسماعيل ختايي دؤولت خاديمي اولماقلا ياناشي، عيني زاماندا دوغما آنا ديلينين بوتون اينجه‌ليكلرينه بلد اولان صنعتكار بير شاعير كيمي ده شؤهرت قازانميشدير.

خالقي‌نين شرفيني، شؤهرتيني، ميلّي ايفتيخاريني قورويان، ادبيات خزينه‌سيني اؤلمز اثرلري ايله زنگينلشديرن شاعير آذربايجان ادبي ديلي‌نين اينكيشافي، تكميل‌لشمه‌سي و سليس لشمه‌سي ايشينده بؤيوك رول اويناميش، بو ديلين كيفيت‌جه يوكسلمه‌سينه چاليشميشدير.

ختايي ايستعدادلي بير صنعتكار كيمي باشا دوشوردو كي، دوغما ديليني بيلمه‌ين، همين ديله اهميّت وئرمه‌ين، اونون اينكيشافينا چاليشمايان بير صنعتكار حقيقي صنعتكار اولا بيلمز. بو سببدندير كي، اونون ديلي عوموم خالق آذربايجان ديلي ايله قيريلماز صورتده باغلي اولموشدور. او باجاريغي و فعاليّتي سايه‌سينده آذربايجان ادبي ديلي‌نين شعر اوسلوبونو اؤز دؤورونه گؤره گؤرونمه‌ميش بير يوكسكليگه قالديرميش و دوغما آنا ديلينده بيلمز اثرلر ياراتميشدير. نهايت بو ديلده آذربايجان ادبياتيندا ايلك مثنويلردن اولان «دهنامه» پوئماسيني يازميشدير.

آذربايجان، فارس و عرب ديللرينده شعر يازماق قابيليتينه ماليك اولان ختايي اثرلرينين اكثريتي‌نين دوغما آنا ديلينده ياراداراق اؤز دؤورونون ادبياتينا روونق وئرميشدير.(1)

آغ قويونلولار و قارا قويونلولارين حاكيميتي دؤورونده آذربايجان ديلي‌نين اهميّتي آرتير، رسمي فارس ديلي ايله ياناشي، سارايدا ياشايان آذربايجان شاعيرلري اؤز آنا ديلينده شعرلر يازير و ادبي مجليسلر كئچيريرديلر.

آذربايجان ديلينه ماراغين آرتماسي، بو ديلده اثر يازان شاعيرلرين ساينين چوخالماسي، حتّي بو ديلين رسمي دؤولت ديلي سويه‌سينه قالديرلماسي شاه اسماعيلين حاكيميتي زاماني داها چوخ موقع تاپدي. بو باره‌ده ياران تاريخ‌چيسي عبدالله رازي «تاريخ مفصّل ايران» آدلي اثرينده يازير: اسماعيل غلبه چاليب تبريزه داخيل اولور. ايران تاجيني باشينا قويدو. 907 هجري بيرينجي اونون ايشي شيعه‌ليگين ايراندا دؤولت ديني اعلان ائديلمه‌سيني قرار آلدي.

سونرا تورك دليني «آذربايجان ديليني. م.ج دؤولت ديني اعلان ائتدي.(2)

بو باجاريقلي دؤولت خاديمي آذربايجان ديلي‌نين حياتي اهميّتيني قطعيتله ثوبوتا يئتيرميش، اونو فارس ديلي ايله ياناشي رسمي دؤولت ديلي سويه‌سينه يوكسلتميشدير.

او زامان سارايدا آذربايجان ديلينده دانيشيلير، دؤولتلر آراسينداكي رسمي يازيشمالار و فرمانلار آذربايجان و فارس ديللرينده آپاريلير، حربي، ديوانخانالار و ايقتيصادي ياشاييشلار علاقه‌دار اصطلاحلارين چوخو آذربايجان ديلينده ايشله‌ديلردي. بو تاريخي حقيقت حاقّيندا مشهور روس عالمي، شرق‌شناس ب.ب. بارتوله بئله يازيردي: «... خاندانين تشكيل تاپديغي يئرده آذربايجان اهاليسي هله او زامان توركجه (آذربايجانجا م.ج) دانيشيردي. تورك ديلي سونرالار صفويلر دؤولتينده ساراي و اوردو ديلي اولاراق قاليردي».

آغ قويونلو، قارا قويونلو و ائله‌جه‌ده قيزيل باش صفوي دؤولتينده كولّي ميقداردا روتبه آدلاري. ايداره ايصطيلاحلاري، حربي ايصطيلاحلار و ايقتيصادي ياشاييشلا علاقه‌دار اولان ايصطيلاحلار يئنه‌ده آذربايجان ديلينده ايدي. مثلاُّ: چارچي (آلاي چاووشلاري)، چاپار (پست‌دا دوران)، كئشيك، كئشيكچي[1] ـ عبدالله رازي ـ تاريخ مفصل ايران تهران 1335 چاپ دوم ص 391

‌باشي، قوشون، چريك، سنگر، سورون (هوجوم)، ياراق (سلاح)، ساخلوو (قازارما)، آياقچي (قاصد)، گول‌آب، گول آبدارباشي، آغا، آلتون، قيزيل؛ آتاليق، باباليق، آذوقه و سايري گؤسترمك اولار. آغ قويونلولار، قارا قويونلولار و صفوي حوكمدارلارينين فرمانلاريندادا بير سيرا آذربايجان سؤزلري ايشله‌ديلرميشدير. مثلاُّ: بير قايدا اولاراق فرمانلارين باشليغيندا «حكم» عوضينه «سؤزوموز» يازيلميشدير.

شاه اسماعيلين حسين‌بي‌له‌له حاقّينداكي فرمانلاريندا «جومله آتاليغي» سؤزو ايشله‌ديلميشدير. بوندان علاوه اورتا عصر فرمانلاريندا بير چوخ تورك (آذربايجان) منشألي وئرگي و حربي اصطلاحلار، روتبه آدلاري ايشله‌نميشدير. مثلاُّ: يايلاق باشي (يايلاقدا وئرگي آلانلار)، قيشلاق باشي (قيشلاقدا وئرگي آلان) چوبان بيي «شيلتاق» (قايدادان كنار وئرگيلر)، دارغا، اون باشي (اون نفر عسگرين باشيندا دوران)، يوزباشي، اولاغ، قونولقا، قوللار آغاسي، ائشيك آغاسي، ياساوول، توپچي باشي، توفنگچي‌باشي، بي‌لر بيي (يوكسك وظيفه)، قوروچي، ميرشكارباشي (اوبا گئتمك اوچون لازيم اولان ترلانلاري ساخلايان آدام)، انباردارباشي، باسماچي (چاپ ائدن)، قاپيچي، توشمال باشي (خؤرك بيشيرمك ايشينه باخان مطبخ باشي)، جاببادارباشي، دؤشلوك (وئرگي)، ديوان بيي (وظيفه)، فرراش (وظيفه)، فراش باشي، قاپيچي باشي، حرمخانا، استراحت قاپيچيسي، قاپيچي باشي ديوان دئمه‌لي، ايلك صفويلر دؤورونده رسمي ديل ايكي‌لشميش، يعني آذربايجان و فارس ديللري اولموشدور. صفوي دؤولتي‌نين داخيلينده ياشايان و اكثريتي تشكيل ائدن آذربايجانليلارا فرمانلار، سليم رفيق رفيع اوغلو اؤزونون 1941 جي ايلده آنكارادا چاپ ائتديرديگي (آذربايجان ادبياتي) كيتابيندا شاه اسماعيلين آذربايجان ديلينده بير امرنامه‌سيني تصوير ائدرك بئله يازير:

«... بو اثرده تورك ديلي فارس ديلي ايله ياناشي رسمي ديل اولاراق آز چوخ مووقع قازانميشدير. بونون اوچون ثوبوت اولاراق هله‌ليك شاه اسماعيلين آذربايجان ديلينده بير امرنامه‌سين گؤستره بيلريك.(3)

ختايي‌نين آذربايجان ديلينده اولان امرنامه‌سي حاقّيندا اوستو اؤرتولو بير شكيلده معلومات وئرن مؤليف بو امرنامه‌نين هارادا ساخلانديغي باره‌ده ده هئچ منع گؤسترمه‌ميشدير.

ماجار عاليمي فئكئتي دايوش ايسه، سونرالار، يعني 17 عصرده صفويلر دؤورونده آذربايجان ديلي‌نين رسمي ديل كيمي نوفوذونو ثوبوت ائده‌رك، 1936جي ايلده ايستانبولدا چيخان تورك‌كييت مجموعه‌سينده‌كي «ايران شاهلارينين ايكي توركجه مكتوبو» آدلي مقاله‌سينده صفوي شاهلارينين آذربايجان ديلينده يازيلميش ايكي مكتوبونو نومونه گؤسترميشدير. فئكئتي لايوشون مقاله‌سيندن آيدين اولور كي، آذربايجان ديلي رسمي ديل كيمي صفوي حؤكمدارلاري شاه صفوينين (1642ـ 1628) و سلطان حسين (1722ـ 1694) شاهين سارايلاريندا اؤز نوفوذونو ساخلاميشدير. آذربايجان ديلينده يازيلميش بو ايكي مكتوبون بيري شاه صفوي طرفيندن اتريش امپراطوري و مجارستان گرالي ايكينجي فردينانتا، ديگري ايسه سلطان حسين شاه طرفيندن ساكسونييا هئرسوقو پولشا گرالي فريدريك اوگوستا گؤندريلميشدير (شاه صفوي طرفيندن گؤندريلن مكتوبون آرخا طرفينده صفوي شاهين مؤهري و همين مؤهرون ايچريسينده ايسه شاهين آدي يازيلميشدير). بورادان گؤرونور كي، شاه اسماعيل و اونون آرديجيل‌لاري خاريجي دؤولتلرله يازيشمالاريني آذربايجان و فارس ديللرينده آپارميشلار. «س س ري لنينگراد شرق‌شوناسليق انيستوتونون اليازمالاري بؤلمه‌سينه موحافيظه‌ اولونان علي مصطفي چلبي‌نين ترتيب ائتديگي «منشأت» قيمتلي منبعدير.

«منشأت»دا موحافيظه اولونان رسمي مكتوبلار 16 عصرده ياشاميش عوثمانلي سلطانلاري، وزير اعظم‌لري، عوثمانلي پاشالاري و باشقا دؤولت باشچيلاري آراسيندا گئدن رسمي يازيشمالاردان عيبارتدير. بو رسمي سندلرين ايچريسينده شاه طهماسبين آذربايجان ديلينده بير مكتوبدا واردير».

«شاه طهماسبين بو رسمي جاواب مكتوبو» عوثمانلي حؤكمداري قانونو سلطان سليمانين (1566ـ 1494) اوغلو 2 سلطان سليمه (1575ـ 1524) يازيلميشدير. مكتوبون باشليغي بئله‌دير:

«شاه طرفيندن گلن جاوابدير». شاه طهماسبين جاواب مكتوب و عالي افندينين «منشأت» ايندا موحافيظه اولونان 2 سلطان سليمين مكتوبونا جاواب اولاراق يازيلميشدير.

1-سام ميرزا، تحفة سامي، تهران 1936 ص 9

2-عبدالله رازي ـ تاريخ مفصل ايران تهران 1335 چاپ دوم ص 391

3-«اورتا عصر آذربايجان تاريخينده داير فارس ديللي سندلر» اثري 23 نومره ايله فرمان. آذربايجان تاريخي انيستوتون علمي آرشيوي.

0 Comments:

Post a Comment

Subscribe to Post Comments [Atom]

<< Home