تورك‌لر ايچره‌ نصاب‌

نوت: بو يازي، طرفيميزدن –يازيم باخيميندان- ائديت ائديلميشدير. مئهران باهاري

رضا همراز
E.mail:r_hamraz@yahoo.com

تبريز´ين‌ كئچميش‌ اديب‌لريندن‌ ساييلان‌ رحمتلي‌ عبدالعلي‌ كارنگ‌ معروف‌ «نصاب‌ الصبيان‌» كتابينين‌ اٶنسٶزونده‌ يازير كي‌،«اينسانين‌ معلوماتي‌ اونون‌ ازبرله‌ ديكلريندن‌ عيبارت‌دير.» تانينميش‌ توركولوق‌ اوستاد محممدعلي‌ فرزانه‌ ايسه‌ نصابلار حاقدا يازير: «نصاب‌ يازماق‌، يعني‌ ايكي‌ ديلده‌ اولان‌ عئيني‌ آنلاييشلي‌ سٶزلري‌، شئعر ميصراعلاريندا بير بيريندن‌ ياناشي‌ قويماقدا قوشا ديللي‌ شئعر قطعه ‌لري‌ ياراتماق‌ و داها دوغروسو ايكي‌ ديللي‌ منظوم‌ سٶزلوك‌ يازماق‌ و بونونلا دا بو، يا او بيري‌ ديلي‌ اٶيره‌ نه نلره‌ يول‌ آچماق‌...» دوغرودان‌-دوغروسو بئله‌ ده‌ اولموشدور. بئله نچي‌ بير يودا بير بيليكلي‌ اولدوقدا اينسانا چوخلو معلومات‌ گره كليدير اٶيره نيب‌، ازبرله‌ سين‌. بو آرا نصابلار ان‌ گٶركه ملي‌ ايشلردن‌ حئسابلانابيله رلر، نصابلار بيزيم‌ ادبيياتيميزدا اسكي‌ بير تاريخه‌ ماليكديرلر. اليميزده‌ اولان‌ قايناقلار اساس‌ ان‌ قديم‌ توركو، فارسي‌ نصابي‌، خويلو حسام‌الدين‌ قوشموشدور. باشقا جور دئسه ك‌، بوگونه‌ كيمي‌ بيزه‌ معلوم ‌اولان‌ يا خود تانينان‌ نصاب‌ دئديييميز كيمي‌ حسام‌ الدين´يندير و هئچ‌ شوبهه‌ يوخدور كي‌، خويي‌´دان‌ اول‌ توركجه‌-فارسجا، توركجه‌، عربجه‌ يا خود توركجه‌ و باشقا ديللرجه‌ نصاب‌ اولموشدور كي‌ هله ‌ليك‌ بيزه‌ آيدين‌ اولماميش‌ و تئز-گئج‌ آيدين‌ اولماسينا امين‌يك‌، دئديييميز كيمي‌ خويي´‌دان‌ سونرا بو كيمي‌ يازيب‌، ياراتمالار خالقيميزين‌ ضييالي‌لاري‌ و شاعيرلري‌ ايچره‌ بير دب‌ كيمي‌ اولموشدور. بيز آشاغيدا تقديم‌ ائده‌جه‌ ييميز مقاله ‌ده‌ تورك‌ ادبيياتيندا خبرلي‌ اولدوغوموز نصابلارا اٶته رگي‌ بير باخيشيميز اولاجاق‌.

1- تحفة‌ حسام‌
فارسجا سٶزلري‌ توركجه‌ يه‌ چئويره‌ ن‌ حسام‌ خوي‌، حسام‌الدين‌ حسن‌ عبدالمومن‌ اوغلو (مظفري‌) و حسام‌ تخللوصلو كي‌ يئددينجي ‌قرنين‌ تانينميش‌ عاليم‌ و شاعيرلريندن‌ ايدي‌. بو نوسخه‌ ائحتيمال‌ وئريلير 55 بنددن‌ عيبارت‌ اولا و گويا موصول´ون‌ حجياتيندا 234نومره ‌لي‌ مجموعه‌ ده‌ قورونور. بو كيتاب‌ 358 و باشقا بير روايته‌ گٶره‌ 296 بئيت‌دير. تاسسوف‌له‌ بعضي‌ اليازما نوسخه‌لرين‌ فئهريست‌لرينده ‌بو كيتابين‌ آدي‌ «نظم‌ حسام‌» ثبت‌ ائتميشلر كي‌ همين‌ سهو بو اثرين‌ گيزلي‌ قالماسيندا تاثيرلي‌ اولموشدور. بونو آرتيرماق‌ ائله‌ جه ‌ده ‌يئرسيز اولماز كي‌، حسامين‌ تحفه‌ سينين‌ هله ‌ليك‌ 23 بيتي‌ الده ‌دير. خويلو حسام´ين‌ بو نصابيندا 3 نوسخه تانينيب‌ كي‌ بئله‌ گوسته رمك ‌مومكوندور:
1- رحمتلي‌ تبريزلي‌ ميرزه‌ جعفر سلطان‌ القرائي´‌نين‌ اوزه ل‌ كيتابخاناسيندا.
2- دوقتور صادق‌ كيان´ين‌ شخصي‌ كيتابخاناسيندا.
3- سيد حسين ‌شهشهاني´‌نين‌ كيتابخاناسيندا كي‌ تئهراندادير قورونور.

قاز دئمكدير بكاو، قازما مكاو
دوك‌ دئمكدير بريز، دٶكمه‌ مريز
هر كه‌ جويد يابد-ايسته‌ يه ن‌ بولا

سحر كي‌ گوللر آچار گولشن‌ (گاشن‌) ايچره‌ رنگارنگ‌
اسه ر نسيم‌ گولر عندليب‌-ي خوش‌ آهنگ‌
تو ز من‌ بشنو اي‌ جوان‌ گل‌ رخسار
به‌ خوان‌ چو مرغ‌ چمن‌ اي‌ عزل‌ به‌ نغمة‌ چمگ‌
دده‌ پدر، دلي‌ ديوانه‌، آناماز پسردي‌، سخن‌ روز
چو آب‌ چشمه‌ بولاق‌ سويي‌، كوزه‌ است‌ سهنگ‌
نه‌ چون‌ و چرا، دلي‌ ديوانه‌، آنامازنادان‌
نه‌ اولدي‌ گتدي‌ ساواشا چه‌ شد كه‌ رفت‌ به‌ جنگ‌...
2- نصاب‌ شاديه‌ :
بو نصاب‌ فارسجا لوغت‌لري‌ توركجه‌ يه‌ چئويريب‌ و قوشاني‌ قونيه ‌لي‌ يحيي‌ اوغلو محمد´دير كي‌، 889 دا قوشولوب‌. بو كيتابدان‌ بير اليازما نوسخه موصول´ون‌ حجياتيندا، ادبييات‌ بخشينين‌ اوچونجو دفترينده‌ 234 نومره ده‌ قورونور.

3- نصاب‌ تركي‌ به‌ فارسي‌ :
بو نصاب‌ 21 بنددير. سون‌ بندللرينده‌ تئيمور شازدالارينين‌ و داها سونلاريندا امير عليشر نوايي´‌نين‌ آدين‌ي گتيرميش‌دير. بو نصابين‌ قوشاني‌ (جاني ‌بن‌ ملك‌ شاه‌ خراساتي‌) كي‌ تجريد قلندري´يه‌ معروف‌ و (تقليد شاه‌ بندري‌)´يه‌ مشهور ايدي‌. شاعير كيتابي‌ محمد ميرزه‌ عيسي‌ بهادرخان‌ پرخاني‌ آدينا قوشموشدور. شاه‌ بندري‌ اٶز نصابين‌ي 965ده‌ باشلاييب‌ 970ده‌ ايسه‌ قورتارميشدير. بو نصابين‌ بير نوسخه ‌سي‌ تئهران´ين‌ سپهسالار يا خود بوگونكو شهيد مطهري‌ كيتابخاناسيندا 2911 نومره ‌ده‌ قورونور كي‌ گويا 1092يه‌ عايد بير نوسخه ‌دير. همين‌ نصاب‌ بئله نچي‌ شكيلده‌ سونا چاتير.

صد شكر كه‌ اين‌ نظم‌ بانجام‌ رسيد
وز درد عليشير به‌ مت‌ جام‌ رسيد
در نهصد و شصت‌ و پنج‌ كردم‌ بنياد
در نهصد و هفتاد به‌ اتمام‌ رسيد

4- نخبه‌ اللغه «تحفه‌ وهبي‌» ‌:
فارسجا-توركجه‌ دير كي‌، روملو محمد وهبي‌ سونبول‌ زاده‌´دن‌دير كي‌، سلطان‌ سليم‌ اوچون‌ قوشموشدور. بو نصاب‌ «تحفه‌ وهبي‌» آدي ‌ايله‌ ده‌ تانينميش‌ و مشهور اولموشدور.

دلستان‌ (دلدار) تعبير اولونور دلبرلره‌
دل‌ (كونول‌) دير قلب‌ معناسيندا باغلاما (منبد)
كبر ائده ن‌ (خودبين‌) كنديسين‌ به يه نميش‌ (خودپسند)
هم‌ اوزون‌ بويلوله‌ هم‌ مومتازه‌ دئرلر (قدبلند)

5- نظم‌ الجواهر :
1300 بئيتليك‌ بو 100 بند‌دن‌ اولان‌ نصاب‌ عربجه‌، فارسجا و توركجه‌ دير كي‌ 1236دا قوشولوب‌ و 1241ده‌ ايستانبولدا چاپ ‌اولموشدور. اونون‌ قوشاني‌ نقشبندلي‌ سيدحسن‌ عيني‌ ايدي‌ كي‌ كيتابين‌ (ماده‌ تاريخين‌) ائله‌ كيتابا عونوان‌ سئچميش‌دير. نقشبندلي‌ قمري‌ 1180دا دوغولموشدور.

6- تحفه‌ كسكين‌:
عرب‌ و فارسجا اولان‌ سٶزلري‌ توركجه ‌يه‌ چئويرميش‌دير. بو نصابين‌ قوشاني‌ توركييه‌ شاعيرلريندن‌ او كسكين‌ ايدي‌. بو نصاب‌ يا خود كيتابين‌ بير اليازما نوسخه‌ سي‌ رحمتلي‌ تبريزلي‌ ميرزه‌ جعفر سلطان‌ القرائي´نين‌ كيتابخاناسيندا، و باشقا بير نوسخه‌ سي‌ ايسه‌ سيد خليل‌ رجائي´‌نين‌ اوزه ‌ل‌ كيتابخاناسيندا نسخ‌ خططي‌ ايله‌ قورونور. يازديقلارا گوره‌ بو نصاب‌ 1248 قمري‌ده‌ قوشولموش‌دور.

7- كالنصاب‌ تركي‌ به‌ فارسي:
بو نصابي‌ علي‌ بادكوبي‌ آدلي‌ بير شخص‌ قزوين´‌ده‌ 1265 هيجري‌ده‌ ناصرالدين‌ شاه´ين‌ آدينا قوشموشدور.

اول‌ آللاه آدينا دوييم‌ نبي‌ خيرالوري‌
جانشين‌ مصطفي‌ باشد علي‌ بدرالدجي‌

بو نصابدان‌ بير نوسخه‌ تئهران´ين‌ (ملك‌) كيتابخاناسيندا، بير اليازما نوسخه‌ 2307 نومره‌ لي‌ جونگ‌دا محممدعلي‌ آدلي‌ بير كيمسه‌ نين‌ خططي ‌ايله ‌كي‌ 1315 قمري‌ده‌ يازيليب‌ قورونور. باشقا بير نوسخه‌ ده‌ تئهرانلي‌ موهنديس‌ شاه‌ علائي‌ شهشهاني´‌نين‌ اٶزه‌ ل‌ مجموعه‌ سينده‌ ناقيص ‌صورتده‌ قورونور كي‌، 25 واراقدان‌ عيبارتدير كي‌ هر واراق‌ 14 سطيرده‌ يازيلميشدير.

8- مرقات‌ الصيبان‌:
بو نصاب‌ گنجه ‌لي‌ سيدمحمدباقرمجتهدزاده‌ 1317 قمري‌ده‌ اوچ‌ ديل‌ ايله‌ (توركجه‌، عربجه‌ و فارسجا) قوشموشدور.

نصاب‌ تركي‌ و فرس‌ و عرب‌ بخواه‌ از من‌
شنيده‌ ورد زبان‌ را زهر مساء و نهار
خداي‌ باشد (الله‌) تنكري‌ (تاري‌)
رحيم‌ (رحم‌ ائله ‌يه ن‌) كارساز هر ناچار
رجل‌ چه‌؟ (مرد) كيشي،‌ مرئه‌ (زن‌) بگو آرواد
چو زوج‌ و شوي‌ (ار) آمد تركي‌ اي‌ دلدار...

بو نصاب‌ 1317 ده‌ مشهد شهه رينده‌ كرپيچي‌ بويوندا 48 واراقدا چاپ‌ اولموشدور.

9- سبيكه‌ المعاني‌ للمصادر و المباني:
بير نصابدير كي‌ 1275 بئيت‌دير و قوشاني‌ اهه رلي‌ ملاحسن ‌طوطي‌ ايدي‌. او معروف‌ (ائل‌ سئوه‌ن‌)لر [شاهسئوه ن] طاييفه‌ سي‌ ايچره‌ بير آغ‌ ساققال‌ و قاضي‌ كيمي‌ ايدي‌ و بير زاماندا چوبانليق‌لا گون‌ گئچيرميشدير. اهه رلي‌ طوطي‌ قمري‌ 1351 قده ر ديري‌ ايدي‌. آنجاق‌ هانسي‌ ايل‌ فوت ‌ائديب‌ بو مقاله ‌ني‌ يازانا آيدين‌ دئييل‌. طوطي‌ بير كيتاب‌ سئوه ر شخص‌ ايدي‌ كي‌ بونا گٶره‌ ده‌ اهه رده‌ بير كيتابفوروشيسي‌ ده‌ وارايدي‌. بو نصاب‌ 1345 قمري‌ده‌ ابوالقاسم‌ صحاف´ين‌ هيمتي‌ و آقا اهري´‌نين‌ خططي‌ ايله‌ 201 صحيفه ‌ده‌ تبريزده‌ موتوسسيطه‌ طلبه ‌لر اوچون‌ چاپ‌ اولموشدور.

10- نصاب‌ تركي‌ به‌ فارسي‌:
گويا بو نصابين‌ قوشاني‌ بللي‌ دئييل‌.

اوغان‌ و تنگري‌ و ايزي‌ تبركي‌ حق‌ ميدان‌
دكر يواج‌ و تنگري‌ ايلچي‌ كوي‌ پيمبر خوان‌

بو نصاب‌ كي‌، مفاعيلن‌، مفاعيلن‌، مفاعيلن‌ده‌ قوشولوب‌، 30 بنددير. بو كيتابين‌ بير اليازما نوسخه‌ سي‌ تئهران´ين‌ سپهسالار كيتابخاناسيندا2911 نومره‌ لي‌ دفترين‌ 54-58 ينجي‌ صحيفه ‌لرينده‌ قورونور.

11- لعلي´‌نين‌ نصابي‌ :
آزربايجانين‌ تانينميش‌ و بيرينجي‌ درجه ‌لي‌ شاعيرلريندن‌ اولان‌ تبريزلي‌ حكيم‌ لعلي‌ (1252 تبريز 1325 ايره وان‌) شئعرلرينين ‌ضيمنينده‌ نصاب‌ طرزينده‌ روسجادان‌ فارسجايا قوشموشدور.

آتتس‌ و پس‌ برات‌ آن‌ يك‌ پدر اين‌ يك‌ برادر دان‌
تواريش‌ هست‌ همراه‌ از ناكوم‌ معروف‌ همديگر
پسر در كوركي‌ مالچيك‌-دووچقا دختر كوچك‌
ترا فرزند اگر باشد همي‌ سين‌ دان‌ و دوچ‌ دختر
اوسن‌ پائيز بود و سنا بهار ولت‌ چه‌ تابستان‌
ولي‌ زيما زمستان‌ است‌ اسنغ‌ برف‌ اغون‌ آذر
نادا لازم‌ دا و لنا بس‌ مالاكم‌ منوقا بسيار
ببخشيد از ونت‌-كاغذا چه‌ وقت‌ ولستر خواهر

12- نصاب‌ شش‌ زبانه‌ :
بو نصابين‌ قوشاني‌ بللي‌ دئييل‌ و توركي‌، فارسي‌، عربي‌، افغانلي‌، هندلي‌، كشميرلي‌ كيمي‌ ديللر لوغت‌لريندن‌ واردي‌.

13- فوائد الصبيان‌ :
توركجه‌، فارسجا و عربجه‌ واژه ‌لري‌ اوشاقلار اوچون‌ قوشولموشدور.

14- نوال‌ الفضلا:
بو نصابي‌ قوشان‌ حسن‌ حلبي‌ كي‌ شعوري´يه‌ معروف‌ ايدي‌ قوشموشدور. شعوري‌ 1105 ده‌ آنادان‌ اولموشدور و اٶز نصابيني‌ عوثمانلي ‌مصطفي‌ پاشا´نين‌ آدينا و خاطيرينا باغلاميش‌دير.

15- مشوق‌ الصبيان‌:
بو نصاب‌ رحمتلي‌ مير يحيي‌ مصطفي‌ اوغلو حسيني‌ زنوزي´نين‌ اثريدير. زنوزي‌ اٶته ن‌ يوز ايلين‌ شاعيرلريندن‌ ايدي‌. اونون ‌اصلي‌ زونوزلو اولسايدي ‌دا تبريزده‌ ياشايب‌ بويا-باشا چاتميشدير. شاعيرين‌ نصابي‌ قمري‌ 1308 ده‌ تبريزده‌ چاپ‌ اولوب‌ كي‌، سونرالار 1333 ده‌ همين‌ كيتاب‌ بير كيتابين‌ ضيمنينده‌ چاپ‌ اولدو و نهايت‌ 1376دا غولامريضا موخليص´ين‌ هيممتي‌ ايله‌ يئنيدن‌ تبريزده‌ باسيلدي‌. بو كيتابين‌ اه وول‌ بئيت‌لري‌:

اي‌ مشتري‌ شمايل‌ خورشيد اشتهار
در بند گيسوي‌ تو دل‌ ماست‌ بي‌قرار
مفعول‌ فاعلات‌ مفاعيل‌ فاعلات‌
شئعري‌ بخوانمت‌ كه‌ بسي‌ باشد آبدار

سٶزلري‌ ايله‌ باشلانيب‌ و

دامجي‌ است‌ قطره‌ شراب‌ چاخير است‌
آهن‌ دميده‌ شد، هفتجوش‌ روئين‌
باشد شكمبه‌ قورساق‌ مطلق‌
قربان‌ ياووق‌ دان‌، تزك‌چه‌ سرگين‌

بئيتي‌ ايله‌ سونا چاتير. شاعير بو نصابي‌ 5 بحرده‌ قوشموشدور.

16- مصاب‌ ميرزه‌ نظام‌ :
اورمولو ميرزه‌ حبيب‌ نظام‌ ناصرالدين‌ شاه‌ دٶورونون‌ يازيچي‌ و شاعيرلريندن‌ ايدي‌ كي‌ بو «مصاب‌»دان‌ علاوه‌ بير سيرا باشقا يازي‌لاري‌ دا وار. بو 134 بئيت‌ليك‌ نصابي‌ شاعير نظام‌ افشار «نصاب‌ الصبيانين‌» هجوينده‌ قوشموشدور.

از گشادي‌ دهان‌ خود به‌ پرسي‌ گويمت‌
سكه‌ (كوچه‌) درب‌ (دروازه‌) است‌ معبر (رهگذر)
خواهمت‌ از بام‌ افتي‌ چا عضوت‌ بشكند
جيد (گردن‌) صدر (سينه‌) ركبه‌ (زانو) راس‌ (سر)

17- نصابچه‌ بديعي‌ :
بو نصابين‌ قوشاني‌ ميلانلي‌ يوسف‌ موسوي‌ ايدي‌ كي‌ ادبييات‌ عالمينده‌ «بديعي‌» ايمضاسي‌ ايله‌ يازاردي‌. بديعي´‌نين‌ نصابي‌ 1277 قمري‌ده‌ تبريزده‌ چاپ‌ اولوب‌ و دئديك‌لره‌ گٶره‌ اليازما نوسخه‌ سينين‌ اوريژينالي‌ رحمتلي‌ آرين‌ پور´ون‌ اٶزه‌ ل‌ كيتابخاناسيندا ايدي‌ كي‌، طالئعيندن‌ خبرسيزيك‌.

رب‌ دان‌ (پرورگار) و رب‌ دان‌ جمعي‌ ز (خلق‌)
رب‌ (آب‌ خالص‌ از انگور و سيب‌ و نار) دان‌
از يكي‌ لفظ‌ (ار) سه‌ معني‌ خواهي‌ اي‌ صاحب‌ كمال‌
اولش‌ را فتح‌ و كسر و ضم‌، بدين‌ ترتيب‌ خوان‌

18 - نصاب‌ يكاني‌ :
بو نصابين‌ قوشاني‌ اسماعيل‌ يكاني´دير. اونلار ايكي‌ نصاب‌ يازيب‌لار كي‌، بيري‌ فيرانسيزجه‌ دن‌ فارسجايا كي‌ چاپ‌ اولوب‌ و ايكينجي‌ ايسه‌ توركجه‌ دن‌ فارسجايا كي‌، هله‌ ليك‌ ايشيق‌ اوزو گٶرمه‌ ميشدير.

19- نصاب‌ اعتماد:
بو نصابي‌ آزربايجان´ين‌ چاغداش‌ و ميللي‌ شاعيري‌ آدلانان‌ رحمتلي‌ مير مئهدي‌ ائعتيماد (1360-1279) قوشموشدور، نصاب-ي‌ ائعتيماد12 بند و 400 بئيت‌دن‌ عيبارتدير كي‌، دفعه‌ لر باسيلميش‌ و اوخوجولارين‌ رغبتين‌ي قازانميشدير. ائعتيماد´ين‌ نصابي‌ 1332 ده‌ چاپ‌ اولموش‌ و كيتابين‌ اٶنسٶزون‌و آزربايجان´ين‌ تانينميش‌ شاعير و آرشديريجيلالريندان‌ اولان‌، رحمتلي‌ ماراغالي‌ نصرت‌ الله‌ فتحي‌ (آتشباك‌) يازميشدير. 1380 ينجي‌ ايل‌ همين‌ نصاب‌ دوكتور حسين‌ صديق´ين‌ بير سيرا ايضاحلاري‌ و آچيقلامالاري‌ ايله‌ برابر 152صحيفه ‌ده‌ تئهراندا ايشيق‌ اوزو گٶردو.

بو 8 بحرده‌ يازيلان‌ نصابدان‌ نئچه‌ بئيت‌ بيرگه‌ اوخوياق‌:

ربوده‌ دلم‌ را يكي‌ گلعذار
كه‌ رخسار او هست‌ رشك‌ بهار
فعولن‌ فعولن‌ فعولن‌ فعول‌
بريزد ز لعلش‌ در شاهوار
رسول‌ - ائلچي‌، يول‌ گٶسته ره ن‌، رهنما
اٶزه‌ ك‌ - دل‌، تاري‌، تانري‌ - پروردگار
تقّلا - چاليشماق‌، بوروق‌ - دٶنگه‌، پيچ‌
ديله ك‌ - آرزو، گٶزله‌ مك‌ - انتظار...
كيشي‌ - مرد، لال‌ - گنگ‌، سوسماق‌ - سكوت‌
خفقان‌ - بوغونتو، سيخينتي‌، فشار
ازيلگه ن‌ - ننز، حرف‌ نشنو، كوناز
فولاق‌ بورماسي‌ - گوشمال‌، هست‌ وار...

20- تجريد اللغات‌ :
بو نصابي‌ باكيلي‌ موللا موصطافا‌ اوغلو حاج‌ موللاعلي‌ قوشموشدور. بو كيتاب‌ 1286 قمريده‌ يازيليب‌ و 1314 قمري‌ده‌ تئهراندا چاپ‌ و يايينلانميش‌دير. همين‌ كيتاب‌دا فولكلوردان‌ بير چوخ‌ سٶز - صٶحبت‌ گئديب‌ و سونرالار توركجه‌ اٶيره ‌نه ن‌لر اوچون‌ بير نصاب‌ دا گلميش‌دير. همين‌ نصابين‌ قوشاني‌ آقا ميرزه‌ علي‌ بادكوبي´دي‌.

ز بحر رمل‌ اي‌ عزيز ابخيز
به‌ بحر تقارب‌ نظر كن‌ تو نيز
فعول‌ فعول‌ فعول‌ فعول‌
ز لعل‌ لبت‌ مثل‌ گوهر بريز
يهه ر زين‌، قيليج‌ تيغ‌ و نوختا لجام‌
اوزه نگي‌ ركاب‌ و قراوش‌ كنيز
چوخور گور و قالخان‌ سپر، قين‌ غلاف‌
سنا تو، قانيم‌ توكمه‌، خونم‌ مريز
كٶپوك‌ كف‌، سويوق‌ شل‌، سولو آبكي‌
چيله‌، سپ‌ - بپاش‌، بال‌ عسل‌، تٶك‌ بريز...
***

آي‌ قمر، ياغيش‌ مطر، گون‌ شارق‌ و ييلديز شيد
بولوت‌، ابر و قار، برف‌ و يئر زمين‌ گوي‌، آسمان‌
ياغ‌ روغن‌، ياغلي‌ چربي‌، نيمچه‌ دوري‌، چك‌، بكش‌
اوددو، بلعيد و قاوون‌، خربوز، قارپوز، هندوان‌...

21- توركو نصاب‌ :
بو نصابين‌ قوشاني‌ بيزه‌ آيدين‌ دئييل‌ و گويا 12 بنددن‌ عيبارت‌ اولان‌ بير نصابدير كي‌، بئله‌ باشلانير:

بودور قطعه‌ ي‌ ابتداي‌ نصاب‌
بخوان‌ تا ز تركي‌ شوي‌ سر حساب‌

22- نصاب‌ بولبول‌ :
بو نصابين‌ قوشاني‌ رحمتلي‌ حاج‌ حسن‌بولبول´دور. بولبول´ون‌ ياشاييشي‌ حاقدا بو سطيرلرين‌ يازارينين‌ معلوماتي‌ يوخدور. آنجاق‌ دئديكلره‌ گٶره‌ او جنوب‌ آزربايجان´ين‌ قاراداغ‌ بٶلگه‌ سينده‌ ياشايان‌ شاعيرلردن‌ اولموشدور.

بو نه‌ وضع‌ عالمدي‌ يا رب‌ هاراي‌
اولور خلق‌ گئتديكجه‌ بي‌ پول‌ گداي‌
بئله‌ گورسه‌ نير يوخ‌ بو درده‌ دواي‌
به‌ بحر تقارب‌ تقرب‌ نماي‌
بدين‌ وزن‌ و ميزان‌ طبع‌ آزماي‌
بازاردا گولوم‌ يوخدو بير شاه‌ صفت‌
بئله‌ سيز گورورسيز كي‌، شيي‌ء مفت‌-مفت‌
وورورسوز هاميز بيربيريزه‌ گلفت‌
رجل‌ مرد- ميره‌ زن‌ و زوج‌ جفت‌
نخي‌ مالدار است‌ و مسكين‌ گداي‌...
... بو اسلام‌ دينينده‌ اول‌ برقرار
ائله‌ امر معروف‌ و اولما كنار
چكير دين‌ و آيين‌ هر لحظه‌ جار
محمد (ص‌) ستوده‌ امين‌ استوار
به‌ قرآن‌ ثنا گفت‌ وي‌ را خداي‌
بو نه‌ خواب‌ غفلت‌دي‌ قارداش‌ اويان‌
گئدير دينين‌ الدن‌ مسلمان‌ اوتان‌
اولوبسان‌ بسان‌ يخ‌ ناودان‌
تكلم‌ سخن‌ گوي‌ اعلام‌ بدان‌
تزب‌ برافروز زيد بر فضاي‌...

23- بحر الفرائب‌ يا نصاب‌ حليمي‌ :
قاضي‌ لطف ‌الله ‌بن ‌يوسف‌ حليمي‌ بو اثري‌ 2200 بئيتده‌ «با يزيد ابن ‌محمدخان‌» ايچون‌ فارسجا-توركجه‌ اولاراق‌ نظمه‌ چكميشدير. اثردن‌ بير نوسخه 2- ينجي‌ نومره‌ لي‌ ايسلامي‌ شورا كيتابخاناسيندا 12911 سايي‌ آلتيندا ساخلانيلير.

24- تحفه‌ شاهدي‌ :
فارسجا - توركجه‌ منظوم‌ سٶزلوك‌. بو سٶزلوك‌ هيجري‌ 921ده‌ قوشولوب‌دور. قوشاني‌ قونيه ‌لي‌ ابراهيم‌ خداداد اوغلو دده‌ شاهدي´‌ديركي‌ 957 فوت‌ ائديب‌. شاهدي‌ بو اثرينده‌ حسام´ين‌ تحفه‌سيندن‌ يارارلانميش‌دير.

... اوقودوم‌ اولا «تحفه‌ حسامي‌»
معطّر اولدو اونونلا جان‌ مشامي‌
ديله‌ ديم‌ كي‌، يازام‌ بير خوشجه‌ نامه‌
نظيره‌ اولا اول‌ «تحفه‌ حسامه‌»

25- نصيب‌ الفتيان‌ و نسيب‌ التبيان‌ :
خويلو حسام´ين‌ ان‌ تانينميش‌ و بلكه‌ ده‌ شاه‌ اثريدير. بو فارسجا نصاب‌ گويا آزربايجانليلارين‌ بيرينجي‌ نصابيدير كي‌ ابو نصردن ‌سونرا قوشموش‌لار و هله‌ بو گونه‌ قده ر بير نئچه‌ ال‌ يازما نوسخه سي‌ تاپيليبدير كي‌، خوشبخت‌ليكله‌ بو اليازمالارين‌ بير سيراسينين ‌اوزوندن‌ 79 ينجي‌ ايلين‌ قيشيندا ايشيق‌ اوزو گٶره‌ بيلدي‌. بو نصاب‌ آنجاق‌ فارسجادير و چوخلو عرب‌ لوغت‌لري‌ ايشه ‌آپاريلميشدير.

26- گرمه ‌رودلي‌ نثار´ين‌ نصابي‌ :
گرمه‌ رودلي‌ نثارين‌ نصابي‌، نصاب‌ ترسل‌ آدي‌ ايله‌ تانينميش‌دير. همين‌ نصاب‌ قمري‌ 1275 ده‌ تبريزده‌ داش‌ باسما طرزي‌ ايله‌ 32صحيفه‌ ده‌ چاپ‌ اولموشدور. اونون‌ اٶلومونو‌ 1279 ايله‌ 1283 آراسيندا قئيد ائتميشلر.

27- شوكوهي´‌نين‌ نصابي‌ :
آزربايجان´ين‌ داهي‌ شاعيرلري‌ ميرزه‌ مئهدي‌ شوكوهي‌ ساتير ادبيياتيميزدا اٶزونه‌ گٶره‌ آدلي‌ - سانلي‌ شاعيرلريميزدن‌ اولموشدور. او طنز شئعرلري‌ ايله‌ برابر هجو، ليريك‌ و عومومي‌ شئعرلرين‌ ده‌ موصننيفي‌ ايدي‌. شوكوهي‌ بونلارلا ياناشي‌ بير نصاب ‌دا قوشموشدور.

سحر كي‌ گوللر آچار گولشن‌ ايچره‌ رنگارنگ‌
اسه ر نسيم‌ چكه ر عندليب‌ خوش‌ آهنگ‌
تو هم‌ ز من‌ بشنو اي‌ جوان‌ گلرخسار
بخوان‌ چو مرغ‌ سحر اين‌ غزل‌ به‌ نغمة‌ چنگ‌
دده‌ پدر، ننه‌ مادر، اوغول‌ پسر، سٶز حرف‌
اٶيود نصحيت‌، آجي‌ تلخ‌، همچو ياوه‌ خفنگ‌
پاييز خزان‌ و قوون‌ خربزه‌، پيچاق‌ چاقو
اوشاق‌ كودك‌، قوز گيردكان‌ و داش‌ چو سنگ‌...

اساس‌ قايناقلار :
1- نصاب‌ الصيبان‌ / ابو نصر فراهي‌/ مقدمه‌ عبدالعلي‌ كارنگ‌/ تبريز 1332 شمسي‌، كتابفروشي‌ صابري‌/
2- فصلنامه‌ وارليق‌ / ياي‌ 1357، سايي‌ 2-101 / سيد مهدي‌ اعتماد´ين‌ (نصاب‌ اعتماد) اثرينه‌ بير باخيش‌، م‌. ع‌. فرزانه‌ / صص‌61-66 / تهران‌
3- لغتنامه‌ دهخدا / مقدمه‌، زمستان‌ 1373 / فرهنگنامه‌ هاي‌ عربي‌ به‌ فارسي‌ علينقي‌ منزوي‌، صص‌ 202 - 271/
4- فرهنگنامه‌ ادبي‌ فارسي‌ (دانشنامه‌ ادب‌ فارسي‌ 2) چاپ‌ اول‌ 1376، تهران‌/ به‌ سرپرستي‌ حسن‌ انوشه‌ / نويسنده‌ مقاله‌ حجت‌ا...اصيل‌/
5- مهد آزادي‌ گونده ‌لييي‌/ چرشنبه‌ 13 مرداد 1378 / آذري‌ صحيفه‌ سي‌/ يحيي‌ شيدا/
6- ديوان‌ حكيم‌ لعلي‌ / رئداكتور محمد علي‌ صفوت‌/ تبريز 1322 / صص‌ 103-102 /
7- نصاب‌ اعتماد، ميرمهدي‌ اعتماد تبريزي‌، حاشيه‌ و تدوين‌ دكتر صديق‌، ناشر غفور آقازاده‌ سلطاني‌ تهران‌ 1380
8- مجموعه‌ آثار حسام‌الدين ‌خويي‌ / حسام‌ الدين‌ حسن ‌بن‌ عبدالمومن‌ خويي‌، اٶنسٶز، تحقيق‌ و نصحيح‌ صغري‌ عباس‌زاده‌ / تهران‌ ميراث‌ مكتوب‌ 1379
9- مشوّق‌ الصبّيان‌، ميريحيي‌ بن ‌مير مصطفي‌ حسيني‌ زنوزي‌ تبريزي‌ متخلص‌ به‌ مضطر، غلامرضا مخلص‌، تبريز اسمر نشرياتي‌،1376 /
10- تحفه‌ حسام‌ - طيبه‌ علسگراوا، جميله‌ صادق‌ اوا- مقاله‌، وارليق‌ ژورنالي‌، سايي‌ 80 - باهار 1370 - صص‌ 76-82
11- وارليق‌ ژورنالي‌ - پاييز 1375 - 3-102 فولكلور ييغماقدا قاباقجيلار- ميرهدايت‌ حصاري‌
12-سخنوران‌ آزربايجان‌، عزيز دولت‌ آبادي‌، جلد دوم‌ ص‌ 987 چاپ‌ دوم‌ 1377، تبريز ستوده‌
13- وارليق‌ ژورنالي‌- باهار 1373 - سايي‌ 1-92 حاج‌ مهدي‌ شكوهي‌، نزهت‌ تبريزي‌ - صص‌ 54-66